Adroddiad newydd y Comisiwn yn tynnu sylw at y camau a argymhellir ar ynni adnewyddadwy er mwyn cyrraedd Cymru sero net erbyn 2050

Wrth lansio'i adroddiad diweddaraf heddiw, "Paratoi Cymru ar gyfer Ynni Adnewyddadwy 2050", mae Comisiwn Seilwaith Cenedlaethol Cymru (CSCC) wedi amlinellu argymhellion allweddol i helpu Llywodraeth Cymru i wireddu Cymru sero net erbyn 2050.

Yr adroddiad newydd yw'r darn mawr cyntaf o waith y mae'r Comisiwn wedi ymgymryd ag ef ers iddo gael ei adnewyddu y llynedd. Mae wedi bod yn ymchwilio i sut y gall Llywodraeth Cymru fanteisio ar werth ynni adnewyddadwy i Gymru, yn edrych ar y cyfleoedd a'r heriau sydd o'n blaenau, ac ar sut orau y gall Llywodraeth Cymru ennyn diddordeb y cyhoedd yn y mater hwn.

Yn yr adroddiad diweddaraf hwn, mae CSCC yn cyflwyno un ar ddeg o argymhellion i Weinidogion Cymru ar sut y gellir cyflwyno newidiadau er mwyn gwella'r ffordd yr eir ati i ddatblygu ynni adnewyddadwy yng Nghymru, a gwneud hynny mewn ffordd sy'n diwallu anghenion ein cymunedau orau. Mae'r argymhellion hynny'n ymdrin ag arweinyddiaeth a gweithredu mewn ffordd strategol; grid ar gyfer y dyfodol; yr amgylchedd adeiledig; y system gynllunio; y manteision i gymunedau a pherchnogaeth gymunedol. Mae Ystad y Goron a'r Comisiwn o'r farn y gallai'r camau a argymhellir, gyda'i gilydd, arwain at newid o bwys a fydd yn galluogi Cymru i gyrraedd ei thargedau carbon.

Wrth siarad am bwysigrwydd yr argymhellion, dywedodd Dr Jennifer Baxter, Dirprwy Gadeirydd Comisiwn Seilwaith Cenedlaethol Cymru:

"Erbyn hyn, rydyn ni'n wynebu cyfnod yn ein hanes lle bydd methu â gwneud ymdrech ar y cyd i newid sut rydyn ni'n mynd ati i ddarparu seilwaith newydd, yn peryglu'n huchelgais o ran sero net a llesiant cenedlaethau'r dyfodol."

Dywedodd Aleena Khan, Comisiynydd Comisiwn Seilwaith Cenedlaethol Cymru (CSCC) a Chadeirydd Grŵp Cynghori Prosiectau Ynni Adnewyddadwy CSCC:

"A minnau'n berson ifanc, dw i'n deall pa mor bwysig yw hi bod Cymru yn cymryd camau pendant i fynd i'r afael â'r argyfwng hinsawdd a'r argyfwng natur. Dw i'n gobeithio y bydd Llywodraeth Cymru yn ystyried pob un o'n cynigion yn ofalus, ac yn edrych hefyd ar yr effaith y byddan nhw'n ei chael o ran ein helpu i gyrraedd ein targedau ynni a charbon.

Mae gweithio gyda nifer o sefydliadau i baratoi'r adroddiad hwn wedi bod yn brofiad hynod bositif. Mae wedi dangos y gallwn ni, drwy weithio fel tîm gyda'n gilydd er lles Cymru, fanteisio ar y cyfleoedd sydd o'n blaenau."

Dywedodd Nick Tune, Comisiynydd Comisiwn Seilwaith Cenedlaethol Cymru (CSCC) a Chomisiynydd Arweiniol CSCC ar Waith Ynni Adnewyddadwy:

"Ar hyn o bryd, dydyn ni ddim yn mynd ati'n ddigon cyflym yma yng Nghymru i ddefnyddio ynni adnewyddadwy er mwyn inni fedru mynd i'r afael â'r argyfwng hinsawdd a diwallu anghenion pobl Cymru.

Mae'r adroddiad hwn yn amlinellu camau hanfodol y mae angen i Lywodraeth Cymru eu cymryd er mwyn bwrw'r targed, h.y., diwallu 100% o'i galw blynyddol am drydan o ffynonellau adnewyddadwy erbyn 2035, gan sicrhau canlyniadau go iawn i bobl Cymru."

Disgwylir i Llywodraeth Cymru ymateb i argymhellion y Comisiwn maes o law.